Украина менен Орусия согуш маалында туткунга түшкөн кезектеги жарандарын алмашты. Бул тууралуу эки өлкөнүн бийлиги 26-июнда билдирди. Азырынча канча аскер тууралуу сөз болуп жатканы так белгисиз.
Украин лидери Владимир Зеленский мекенине кайтып келген украиналык аскердик кызматкерлердин сүрөттөрүн Телеграмдагы каналына жарыялап, алардын көбү согуш башталган 2022-жылдан бери туткунда жатканын жазды. Бирок ал тараптар канча аскерди алмашканын тактаган жок.
Орусиянын Коргоо министрлигинин маалыматына ылайык, Украина өткөрүп берген орус аскерлери Беларуска жеткирилди.
Киев менен Москва июнь айында Стамбулда өткөн сүйлөшүүлөрдө согуш туткундарынын бир нече тобун алмашууну макулдашкан.