Орусиялык аскерлер өткөн түнү Киевге жаңы ракеталык сокку урду. Шаар бийликтеринин айтымында, бери дегенде алты киши каза таап, 19у жарадар болуп, анын сегизи ооруканага жаткырылды.
Киевдин алты району аткылоого кабылды. Турак жайлар, соода борборлору, метро, станциялар жана башка объекттер талкаланды.
2024-жылдын 22-июнуна караган түнү Орусия Украинага жапырт аба чабуулун жасады.
Бул тууралуу Украинанын Аскер аба күчтөрүнүн башкармалыгы билдирет. "Искандер-М" / KN-23 баллистикалык ракетасы (Воронеж жана Ростов облусунан), бир С-300 зениттик башкарылуучу ракета (Орусия көзөмөлдөгөн Донецк облусунан), 47 даана Shahed тибиндеги дрон-камикадзе, жана башка түрдөгү БПЛАлар (Курск жана Приморско-Ахтарск шаарларынан) Украинага карай учурулган.
Чабуулдан Донецк, Сум, Одесса облусу жабыркады. Негизги сокку Чернигов облусундагы объекттерге багытталган. Славянск шаарында түнкү чабуулдан бир киши каза болду. Краматорскиде турак жай талкаланды.
Орусиянын президенти Владимир Путин Украинанын түндүгүндөгү Сумы шаарын басып алуу ыктымалдыгын четке каккан жок. “Биздин андай максатыбыз жок, бирок негизинен мен муну четке какпайм», - деди Путин жума күнү Санкт-Петербургдагы эл аралык экономикалык форумда.
Путиндин айтымында, Орусия Сумы облусунда чек арадан 12 чакырымга чейин “коопсуздук зонасын” түзүүгө аракет кылып жатат. “Алар (Украинанын Куралдуу күчтөрү) биздин Курск облусуна чейин кирип келип, кылмыштарды жасашты. Биз аларды кууп чыктык. Эми биз коопсуздук зонасын түзүүгө мажбур болуп жатабыз”, - деп айтканын “Настоящее время” каналы билдирди.
Сумы облусунун административдик борбору болгон бул шаарда согуш башталганга чейин 255 миңдей адам жашачу. Москва 2022-жылдан бери мындай ири шаарларды басып алган эмес. Толук масштабдагы баскынчы аракеттер башталгандан бери Орусияга Украинанын бир гана облустук борбору – Херсонду басып алуу мүмкүн болгон. Бирок кийинчерээк орус аскерлери ал жерден кайра артка чегинишкен.
Жумага караган түнү Одесса орус армиясынын жапырт соккусуна кабылды. Украинанын Чукул кырдаалдар кызматынын маалыматына караганда, орусиялык дрондор шаардагы ондогон жайга чабуул койгондо өрт тутанды, 10 киши, арасында куткаруучулар жараланды. Кийин прокуратура бир киши набыт болгонун билдирди.
Пилотсуз учактардын бири тийген төрт кабат үйдү өрт чалды, тургундарды куткарууга үлгүрүштү, бирок үч өрт өчүрүүчү жаракат алды.
Ошондой эле 23 кабат турак жайдын өйдөкү кабаттарында өрт болду. Ал жактан 600 кишини эвакуациялашты.
Жергиликтүү жетекчилик үйлөрдөн тышкары административдик имараттар, темир жол вокзалынын инфраструктурасы зыян тартканын билдирди.
Орусия түнкү чабуулду комментарийлеген жок. Буга чейин болгон ушул өңдүү соккулардан кийин алар аскердик өнөр жай ишканаларын бутага алганын айтып келишкен.
Харьковдо дрон чабуулунан төрт киши жабыркаганы маалымдалды. Бардыгы болуп, Украинанын Аба күчтөрү билдиргендей, 86 пилотсуз учак учурулуп, алардын 70и атып түшүрүлдү. Буга чейинки күндөрдө украин аймагы мындан көп дрондор менен аткыланган.
Турак жайлар талкаланып, карапайым кишилер каза таап жатканы менен Москва бутага аскердик жайларды алганын айтып келет.